Thủ tướng neh mblàng lơh loh jơnau gơtha kuơmàng, jơnau kờñ bơh broă bơtàu tơnguh phan bơna, rơndap tap sèng phan bơna gùng lòt mờ lam lơh jat ngan ngồn tềm pềr, rơcang sơndră pơhì pơhà.

Thủ tướng sồr pơn jat tai tơnguh jơnau git wă bè lam lơh jat ngan ngồn tềm pềr, rơcang sơndră pơhì pơhà gơ jat bal mờ broă lơh rơcang sơndră sa kuề sa kuà, bơta ờ niam jat jơnau đơng lam bơh Tổng Ƀí thư ồng Nguyễn Phú Trọng dê; sồr ală kâp, ală gah broă lơh, ală tiah, anih lơh broă, mpồl lơh broă, làng bol mờ mpồl lơh sa kă bro gùt lơgar tơrgùm tàm pơrlòng lam lơh jat niam 2, 3 kơnòl broă tờm, lơh gơlik nùs nhơm tàm pơrlòng duh hồl tàm bơt bơtàu, bơtàu tơnguh rơndap tap sèng phan bơna mhar, kơ̆ kơljap; sồr ală ƀộ, gah broă lơh, gơnoar atbồ kâp hơ đơm ngui niam uă ngan rlau jơh kơnòl lơh krơh lài, khin sơnơng, khin lơh, khin kong kơnòl tài bơta kuơ bal.