Tàm nùs nhơm lơh bơyô bal, pin dờn bal mờ sơrmah sơrmài, bàr nă Thủ tướng dùl nùs ring bal đơs là, nùs nhơm lơh bơyô bal ờs mờng bơh yau đah Việt Nam mờ Lo bơh Củ tịc Hồ Chí Minh, Củ tịc ồng Mao Trạch Đông mờ ală rơnàng kwang bàng đơng lam bồ lài do bơh bàr lơgar dê să tờm tơn bơ̆t mòn mờ roh uă dà kơlhề tŭ tơngai bơ̆t mòn là jơtài bal kwơmàng ngan bơh bàr Đảng, bàr Dà lơgar dê, kờñ pal sùm tàm pơdờn, sền gàr mờ đòm jăt; đơs sùm bơta kwơmàng bơh gĭt gơ̆p đah 2 lơgar dê gơwèt mờ bơta bơtàu tơnguh bơh tơl lơgar dê kung bè ring lơngai, kơ̆ kơl jăp, lơh broă bal, bơtàu tơnguh bơh kơnhoàl ù tiah rềp bal mờ tàm dunia dê.

Bè gùng dà chồl tơnguh lơh broă bal tàm tơngai tus, bàr nă Thủ tướng dùl nùs ring bal rơ̆p sơlơ cribơyai, pơgồp bal, lơh ngan chồl tơnguh gĭt gơ̆p đah 2 lơgar mŭt tàm tŭ tơngai bơtàu tơnguh pa, kwơmàng chồl tơnguh ală gah broă lơh broă bal, ngan là lơh broă bal lơh sa, kă bro gơlòt mŭt ngan ngồn tàm uă broă, geh cồng nha mờ kơ̆ kơl jăp jŏ jòng; gàr sùm mpồl lơh broă bal lơh bơyô bal đah Ƀộ Quôk phòng, Ƀộ Kwang àng bàr lơgar dê, bơ̆t bơtàu bal tiah nhàr lơgar bơh bàr lơgar dê gơ gơs là gùng lòt tiah nhàr lơgar ring lơngai, kơ̆ kơl jăp, lơh broă bal mờ bơtàu tơnguh.