VOV4.K’ho- Mho ngai 19/07, di tơngkah kir sơnrai 75 nam ngai Cau ling sồt să- Cau ling chơ̆t màng, Thủ tướng Cíñ phủ ồng Phạm Minh Chính neh lòt còp mờ pà phan ai ală cau ling sồt să, cau ling kòp tê jê să tàm Anih tờm sền gàr kham sơm kòp cau ling sồt să Kim Bảng, càr Hà Nam in.

Ala mat kwang bàng đơng lam bồ Đảng, Dà lơgar mờ nùs nhơm să tờm is, Thủ tướng ồng Phạm Minh Chính neh pơyua tus ală cau ling sồt să, cau ling kòp tê jê să, cau geh màng mờ kăc màng tàm jơh gùt lơgar mờ ală oh mi là cau ling sồt să, cau ling kòp tê jê să gam geh sền gàr kham sơm kòp tàm Anih tờm sền gàr kham sơm kòp cau ling sồt să Kim Bảng, càr Hà Nam jơnau còp să đềt mềr mờ ală nùs nhơm sền dờng màng ngan rlau jơh. Thủ tướng chờ hờp tŭ kơno yal Anih tờm do tŭ do là hìu ơm bal bềng bơta nđàc bơh 77 nă cau ling sồt să, cau ling kòp tê jê să kơn jơ̆ khà uă ngan, roh pràn lơh broă bơh 81% rlau hơđang mờ 35 nă cau pròc mhàm cau geh màng mờ dà lơgar dê.

Di tàm dơ̆ do, Thủ tướng sồr Ƀộ Lao động, Thương ƀiñ mờ Xã hội mờ ală anih lơh broă geh gơrềng lơh jăt niam broă dong kờl bơh dà lơgar dê gơwèt mờ cau geh màng mờ kăc màng, gĭt nền broă sền gròi lơh jăt broă dong kờl bơh dà lơgar dê ai cau geh màng mờ dà lơgar in là kơnòl broă, kơnòl broă lơh sùm mờ jŏ jòng bơh jơh ală anih lơh broă cíñ trị mờ jơh gùt mpồl bơtiàn dê.

Cau mblàng Lơ Mu K’Yến