Ala mat kwang đơng lam bồ Đảng, Dà lơgar, Thủ tướng nting bơr ală sau kơnòm bơsram rơp geh dùl kàl rlô bơkang chờ hờp, lơngăp lơngai mờ bềng bơta niam bal mờ hìu bơnhă, cau pròc mhàm tờm mờ gơp bơyô. Thủ tướng pà git, ală nam do, Đảng, Dà lơgar he sùm sền gròi uă ngan tus broă lơh sền gàr, sền gròi kơnòm dềt, lơh gơlik tơl bơta niam ngan rlau jơh nàng kơnòm dềt in geh dờng pràn tơl làm, geh tiah ơm kis lơngăp lơngai, niam bơnĕ, ki ngàm, iat, sền sơ wì, hơ wơl jơnau đơs, bơta kơp kờñ bơh kơnòm dềt dê; ờ gŏ di ờ rờm mờ gàr bơta kuơ niam ngan rlau jơh bơh kơnòm dềt dê tàm ală jơnau lơh nền geh gơ rềng; sền do là broă cèng bơta kuơmàng, jŏ jòng. Ală kâp, ală gah broă lơh, ală tiah, ală mpồl lơh broă mpồl bơtiàn, mpồl cau mờ làng bol sùm sền gròi, bơcri priă, gròi sền tus broă lơh bơto bơtê, sền gàr pràn kơldang să jan, ngan là gơ wèt mờ kơnòm dềt rƀah, kơnòm dềt geh rài kis uă kal ke, kơnòm dềt kuet kơlte, kơnòm dềt kòn đời.