VOV4.K’ho- Ngai 08/02, di tơngkah kir sơnrai 92 nam Ngai crơng gơs Đảng Kộng sản Việt Nam mờ lòt lơh broă wơl tơnơ̆ dơ̆ ơm rlô sa tềp bơhiàn dà lơgar nam Ñâm Zần 2022, Thủ tướng Cíñ phủ ồng Phạm Minh Chính còp mờ gờm chờ sa tềp kwang bàng, cau lơh broă tàm Ngân hàng Dà lơgar Việt Nam mờ gah ngân hàng.

Nam 2021, Ngân hàng Dà lơgar Việt Nam neh ai tơlik broă lơh ờ hềt lùp dồs, tơn jŏ tơngai tơm dồs mờ rơndăp wơl tŭ tơngai tơm dồs, ờ sa halà tơrmù priă cồng, priă pal tă. Pơgăp 600 rbô nă cau năc càn priă mờ kờp jơh priă dồs càn rlau 280 rbô tơmàn đong neh geh rơndăp wơl tŭ tơngai tơm dồs; mờr 2 tơlak nă năc càn priă mờ kờp jơh priă dồs càn rlau 4 tơlak tơmàn đong geh ờ sa halà tơrmù priă cồng ai càn priă; ờ sa, tơrmù rlau 2 rbô 500 tơmàn đong priă pal tă drơng broă tơm priă, ai càn priă gơwèt mờ ală mpồl ngui cau lơh broă, cau lơh broă bơh Ngân hàng Cíñ sac xã hội...

Nam 2022, yal lài lơh sa dunia mờ tàm lơgar pơn jăt tai gơbàn kal ke mờ ờ gơtùi gĭt lài tài gơrềng bơh kòp dờng Kovid-19. Thủ tướng sồr gah Ngân hàng pơn jăt tai đơng lam rơcăng lài, ngac ngar, dùl ròt bal ală phan ngui broă lơh priă jền, lam lơh geh cồng nha ală broă lơh dong kờl bơtàu tơnguh wơl, bơtàu tơnguh lơh sa, dong kờl ai tơl bơta ai làng bol mờ mpồl lơh sa kă bro in geh ƀươn ƀoài càn priă ngân hàng nàng bơtàu tơnguh wơl mờ bơtàu tơnguh lơh sa, kă bro.

Cau mblàng Lơ Mu K’Yến