Tàm dơ̆ lòt còp ngan ngồn lơgar Hàn Quôk dơ̆ do, kờp dŭ lài Thủ tướng Cíñ phủ ồng Phạm Minh Chính rơp geh rlau 30 broă lơh. 

Bơdìh ală broă lơh ngan ngồn mờ Kwang đơng lam bồ kâp dờng lơgar Hàn Quôk, Thủ tướng Cíñ phủ ồng Phạm Minh Chính rơp tus bal mờ đơs tàm 3 dơ̆ Cribơyai, geh Cribơyai mpồl lơh sa kă bro, Cribơyai hòi jà lòt nhơl mờ lơh broă bal niam chài, Cribơyai cau lơh broă đah Việt Nam mờ Hàn Quôk mờ 2 dơ̆ tơm boh bơr, geh Tơm boh bơr mờ Kwang đơng lam bồ ală Mpồl lơh sa lơgar Hàn Quôk mờ Tơm boh bơr mờ ală cau geh bồ tơngoh bơsram sră, cau jak chài lơgar Hàn Quôk bè ƀãn zẫn mờ bồ tơngoh jak kòn bơnus lơh gơs. Thủ tướng kung rơp geh ală dơ̆ wă kwang ala mat kwang đơng lam bồ bàr, pe Tập đoàn Lơh sa khà dùl lơgar Hàn Quôk gam bơcri priă tàm lơgar Việt Nam.