VOV4.K’ho - Mho òr (13/09), tàm hìu lơh broă Cíñ phủ, Thủ tướng Cíñ phủ ồng Phạm Minh Chính neh cri bơyai mờ Củ tịc Quốk hội lơgar Campuchia ồng Samdech Heng Samrin gam còp mùl màl lơgar Việt Nam.

   Thủ tướng Cíñ phủ ồng Phạm Minh Chính wă Củ tịc Quốk hội lơgar Campuchia ồng Samdech Heng Samrin

Tàm dơ̆ wă, Bàr Kwang đơng lam tơlik nùs nhơm di nùs bè broă tơnguh bơtàu kơ̆ kơl jăp bơh broă lơh git gơ̆p đah lơgar Việt Nam mờ lơgar Campuchia. Bè gùng dà tơnguh lơh broă bal đah bàr lơgar tàm tơngai tus, bàr Kwang đơng lam ring bal geh lơh sùm broă tìp bal, cri bơyai bal kấp dờng tàm jơh ală gah broă nàng geh lơh sùm broă lơh bal cíñ trị pin dờn; ală anih lơh broă adăt boh lam mờ lơh jăt adăt boh lam bàr lơgar pơn jăt tai tơnguh gơnoar chồl pràn broă lơh git gơ̆p. Cri bơyai bè lơh broă bal uă lơgar, bàr Kwang đơng lam ring bal bàr gah pơn jăt tai pơgồp bal, kờñ bal tàm ală pơrjum cri bơyai dunia mờ tàm tiah do. Thủ tướng ồng Phạm Minh Chính đơs, lơgar Việt Nam kờñ mờ pin lơgar Campuchia dờp geh cồng nha gơnoar Củ tịc mpồl ASEAN mờ AIPA tàm nam 2022 do.

Cau mblàng Ndong Brawl