Tơnơ̆ dơ̆ bơyai lơh wă rò yŭ rơyùm, bàr nă Thủ tướng neh cribơyai. Tàm dơ̆ cribơyai, Thủ tướng Cíñ phủ Việt Nam ồng Phạm Minh Chính tơngŏ nùs nhơm chờ hờp dơ̆ sơnrờp lòt còp lơgar Đại kông quôk Luxembourg, ưn ngài bơta wă rò jơh nùs mờ wil tơl ngan bơh Cíñ phủ lơgar Luxembourg dê lời Mpồl in. Thủ tướng Cíñ phủ Việt Nam đơs nền, Việt Nam sùm sền dờng màng bơta gĭt gơ̆p tam klăc lơh broă bal mờ lơh broă bal tơl ală bơta mờ Luxembourg, dùl lơgar bơceh lơh, geh gơnoar broă kwơmàng bơh Mpồl Tam klăc câu Âu (EU) dê. Gờm chờ mờ wă rò Thủ tướng Cíñ phủ Việt Nam ồng Phạm Minh Chính còp ngan ngồn lơgar Luxembourg, dơ̆ lòt còp kwang bàng kâp dờng dơ̆ sơnrờp tơnơ̆ 10 nam đah 2 lơgar, Thủ tướng lơgar Đại kông quôk Luxembourg ồng Xavier Bettel jờng rơ ngan bơta gơtha dờng màng ngan bơh dơ̆ lòt còp dê, tơlik nùs nhơm pin dờn dơ̆ lòt còp rơ̆p ai bơta gĭt gơ̆p 2 lơgar mŭt tus tŭ tơngai bơtàu tơnguh pa.

Bàr Thủ tướng đơs sùm bơta kwơmàng bơh broă lam lơh jăt geh cồng nha tơngume lơh broă bal neh geh, mơkung kơlôi sơnơng lơh mpồl lơh broă bal pa dipal mờ bơta pràn, jơnau kờñ bơtàu tơnguh bơh 2 lơgar dê. Bàr gah ring bal sồr gờñ lơh gơs tơngume Tam klăc lơh broă bal jŏ jòng bè priă jền tơlir, nàng kờñ ngui niam bơta pràn bơh Luxembourg dê bè priă bơcri, ngan là priă jền tơlir, nàng dong kờl Việt Nam lam lơh Broă rơndăp lơh Dà lơgar bè gơguh tai tơlir mờ lơh ngan tam dră wơl mờ tam gơl trồ tiah, tàm hơ̆ geh broă lơh jăt ală jơnau hơ neh geh hơ tàm COP 26.