Tàm dơ̆ cribơyai, 2 nă Thủ tướng ring bal pơn jăt tai sơlơ tơnguh ală dơ̆ lòt còp, tìp mat kwang bàng kấp dờng mờ ală kấp tàm jơh bal ală gah Đảng, Dà lơgar, Cíñ phủ mờ Nghị viện; ngan là ring bal rơ̆p bơyai lơh dơ̆ tìp mat pah nam đah Thủ tướng 2 lơgar dê nàng cribơyai bè lơh broă bal đah 2 gah mờ ală broă sền gròi bal.

Bàr nă Thủ tướng đơs sùm pal lam lơh geh cồng nha bơta gĭt gơ̆p lơh broă bal lơh sa tơlir- Lơh sa sồ, lơh geh bơnàng jă ai lơh broă bal đah lơgar Việt Nam mờ Singapore gơ gơs broă lơh tơrlòng lài tàm tài tơnơ̆ do tàm Asean; jờng rơ uă ngan broă 2 gah neh di tŭ lơh sir broă lơh niam wơl Hiệp địñ khung tàm tơrbŏ bal 2 rài lơh sa đah lơgar Việt Nam mờ Sigapore. Thủ tướng Cíñ phủ ồng Phạm Minh Chính sồr lơgar Singapore lơh geh ală bơta sơlơ tơnguh blơi phan bơh lơgar ndai ală bơta phan bơh lơgar Việt Nam dê; rề ơnàng bơcri priă tàm ală gah broă tờm mờ gơwèt mpồl ai lài bơh lơgar Việt Nam dê; dong kờl lơgar Việt Nam bơtàu tơnguh ală gah lơh sa mờ măi mok dong kờl ală gah lơh gơlik phan bè tàñ mai, mòn lơh phan dơm chi, lơh ơhò, bơtàu tơnguh phan bơna lơh sa mờ măi mok, hoá cất, hóa zờu.