Bè broă rơndăp lơh, kơnòl broă tờm nam bơsram 2023-2024 Thủ tướng sồr ală Ƀộ, ngàñ, anih lơh broă, ală tiah pơn jat tai kờp sền, tam gơl wơl, bơtơl di tŭ kơrnoat boh lam, gùng dà broă lơh, lơh sir adat boh lam ƀuơn ƀoài nàng lơh jăt broă tam gơl pa gah bơto bơtê, rơndăp ù tiah ală anih bơto bơtê đại họk mờ sư phạm tơngai bơh nam 2021- 2030, rơndăp broă lơh tus nam 2050 mờ gờñ yal Rơdăp broă lơh pơrlòng jơh bơsram kấp pe jat Broă lơh bơto bơtê pe kấp nam 2018.

Ngan là Thủ tướng sồr, bơyai lơh niam broă tơn jơh 10 nam lơh jăt Nghị quyết sồ 29 bơh Dà lơgar dê bè tam gơl kwơ màng, tơl làm gah bơto bơtê; pơn jat tai kơlôi sơnơng, lơh sir, lơh uă broă lơh bơto bơtê pe kấp nam 2018 di pal mờ jơnau kờñ, jơnau sồr geh ai. Bơdìh hơ̆, Thủ tướng jàu ală Ƀộ, ngàñ, ală tiah pơgồp bal mờ Ƀộ Giáo dục mờ Đào tạo geh broă lơh priă jền dong kờl cau pơgru tiah sar lơgar ngài; pơn jat tai bơcri priă lơh phan bơna bơt bơtàu kwơ màng bè gùng pờ internet tàm ală tiah jơi bơtiàn dùl ết nă cau, tiah kơh bơnơm, bồt bơlào. Thủ tướng Cíñ phủ ồng Phạm Minh Chính kung sồr tơl nă kơnòm bơsram, cau bơsram dờng pal pơnđơl pràn lơh ngan, bơsram mờ bơsram tàp; jơh nùs, lơh is, rcang is mờ bơceh lơh uă rlau tàm ală broă bơto bơtê mờ bơsram. Thủ tướng ồng Phạm Minh Chính đơs:“Nam bơsram pa 2023-2024, Thủ tướng gờm chờ ală kwang bàng lơh broă lơh atbồ, ală cau pơgru sùm lơh jăt niam nùs nhơm kờñ gơboh dà lơgar, nùs nhơm geh kơnòl mờ jơh nùs bè broă lơh, bơsong tơl bơta kal ke, jơh nùs lơh jăt jơnau kờñ tam gơl pa kwơ màng, tơl làm gah bơto bơtê, di pal mờ bơta kơ̆p kờñ bơh Đảng, Dà lơgar mờ Làng bol dê, tă pơgồp di pal tàm bơta bơtàu tơnguh dờng pràn, pas gơs bơh Dà lơgar dê”.