VOV4.K’ho- Drim ngai 29/09, tàm Hìu duh broă Củ tịc, Thủ tướng Cíñ phủ ồng Phạm Minh Chính đơng lam Dơ̆ bơyai lơh wă ngan ngồn Thủ tướng lơgar Kộng hoà Cuba ồng Manuel Marrero Cruz bal mờ Mpồl kwang bàng kâp dờng Cíñ phủ Cuba còp gĭt gơ̆p lơh bơyô ngan ngồn lơgar Việt Nam.

Tơnơ̆ dơ̆ bơyai lơh wă tơn, Thủ tướng Cíñ phủ ồng Phạm Minh Chính mờ Thủ tướng lơgar Kộng hoà Cuba ồng Manuel Marrero Cruz bơyai lơh cribơyai. Do là dơ̆ lòt còp bơh Thủ tướng Cuba ồng Manuel Marrero Cruz dê nàng kờñ lơh jăt ală tơngume ring bal lơh geh đah kwang đơng lam bồ kâp dờng 2 lơgar dê, tàm pơn jăt mờ bơtàu tơnguh bơta gĭt gơ̆p dờng màng đah Việt Nam mờ Cuba, tơngŏ bơta jơh nùs lơh ngan bơh 2 gah dê tàm broă pơn jăt tai bơtàu tơnguh mờ lơh niam rlau bơta gĭt gơ̆p lơh bơyô bal, tam klăc bal dùl nùs, pin dờn bal mờ gơ̆p, lơh broă bal tơl làm đah Đảng, Dà lơgar, Cíñ phủ mờ làng bol 2 lơgar.

Di dơ̆ lòt còp, Thủ tướng Cuba geh chờ hờp dờp Gai lòng Hồ Chí Minh; tus bal dơ̆ bơyai lơh kĭ sră lơh broă bal đah 2 gah; tus bal Cribơyai mpồl lơh sa kă bro Việt Nam mờ Cuba; tìp măt kwang đơng lam bồ ƀòn dờng Hồ Chí Minh mờ bàr pe broă lơh ndai.

Cau cih VOV Tây Nguyên- Cau mblàng Lơ Mu K’Yến