Đơs pơn dut dơ̆ lơh broă, ala mat Cíñ phủ, Thủ tướng Cíñ phủ jờng rơ bơta lơh ngan mờ cồng nha lơh geh bơh Đảng ƀộ, gơnoar atbồ, ling klàng mờ làng bol ƀòn dờng Hồ Chí Minh dê, neh pơgồp bơnah tàm cồng nha bal bơh gùt lơgar dê.

Tàm tơngai tus, Thủ tướng sồr, pal pơn jat tai pơlam, lam lơh jat ngan ngồn Nghị quyết pơrjum dờng dơ̆ XIII bơh Đảng dê, ală Nghị quyết, jơnau pơn dut bơh Ƀộ Cíñ trị dê bè bơtàu tơnguh tiah đah jum mat tơngai lik dà lơgar, ƀòn dờng Hồ Chí Minh; broă rơndap lơh 5 nam, broă rơndap lơh 10 nam mờ Nghị quyết pơrjum dờng Đảng ƀộ ƀòn dờng dơ̆ XI. Thủ tướng sồr ală ƀộ, gah broă lơh dà lơgar jat gơnăp gơnoar, kơnòl broă he dê mờ rơcang lài bơsong ală broă ƀòn dờng dê, pơgồp bal ring bal đah broă lơh lơh tơn mờ pờ tơlik tàm internet, ờ huan lòt rê, tơrmù ƀà sră nggal, mờ nùs nhơm geh kơnòl uă ngan rlau jơh.