VOV4.K’ho- Drim ngai 13/09, Thủ tướng Cíñ phủ ồng Phạm Minh Chính neh đơng lam dơ̆ pơrjum dơ̆ 17 bơh Mpồl đơng lam rơcăng sơndră kòp Kovid-19. Dơ̆ pơrjum geh bơyai lơh pờ tơlik tơn tàm internet đah anih bơh sơnrờp là Cíñ phủ tus mờ 63 càr mờ ƀòn dờng tàm jơh gùt lơgar.

Đơs tàm dơ̆ pơrjum, Thủ tướng ồng Phạm Minh Chính pà gĭt, tus tŭ do, bol he gàr kơ̆ kơl jăp lơh sa dờng, gròi sền roh giă priă, bơtàu tơnguh wơl lơh sa mờ chồl tơnguh gơguh lơh sa; rài kis làng bol geh tam gơl niam. Ală cồng nha hơ̆ là kơnờm bơta đơng lam dipal, di tŭ bơh Ƀan Câp hàñ Đảng Dà lơgar mờ să tờm mờ sùm sùm tơn là Ƀộ Cíñ trị, Ƀan Ƀí thư; bơta lơh bal, pơgồp bal jơh nùs bơh Quôk hội dê, bơta mŭt lơh bal bơh jơh ală anih lơh broă cíñ trị dê...

Bol he neh lơh gơtùi broă lơh vaccine. Bulah bè hơ̆, tŭ do geh jơnau nùs nhơm ờ rơcăng ngăc, sền ờ sơ̆p mờ kòp bơtờp. Nùs nhơm ờ rơcăng ngăc, sền ờ sơ̆p den tàng broă cĭt vaccine ờ hềt lơh geh di jơnau kờñ jăt nùs nhơm sồr lơh bơh Mpồl đơng lam dê. Do là broă kờñ pal mblàng sền nền nòn. Thủ tướng sồr, bơsong jơnau geh ngan ờ tơl sơnơm, măy mok, phan bơna gah lơh sơnơm; ai tơl mpồl cau lơh broă gah lơh sơnơm; tơnguh tai broă mblàng yal, tơnguh uă rlau tai bơta gĭt wă rơcăng sơndră kòp bơtờp bơh Làng bol dê.

Cau mblàng Lơ Mu K’Yến