Mho ngai 24/08, Thủ tướng Cíñ phủ ồng Phạm Minh Chính đơng lam dơ̆ pơrjum Cín phủ mìng dùl tơngume lơh adat boh lam nhai 08 nam 2023 nàng cribơyai ală rơndăp broă lơh adat, bè: Adat Càr lơgar (tam gơl); Adat Rơndăp tăp sèng lơngăp lơngai lòt rê tàm gùng ù gờl; Adat  Gùng ù gờl; Adat Lơh sa mờ măy mok sền gàr dà lơgar, lơngăp lơngai mờ hòi jà pơnjờng lơh sa mờ măy mok. Tàm dơ̆ pơrjum, Cíñ phủ neh iăt anih lơh broă đơng lam sền dùl êt ală jơnau rơcăng cih adat; jơnau yal mblàng hơ lơh loh, iăt kơno jơnau đơs tă pơgồp lơh ală rơndăp broă lơh adat; tơrgùm jơh ală jơnau đơs tă pơgồp bơh ală ƀộ, gah lơh broă dê; sền swì bè ală broă pơlam lơh, sră nggal rơcăng; ală jơnau sồr, bơta pal jăt lơh Adat; bơta ndrờm bal, ring bal mờ ală jơnau cih bơh adat boh lam geh gơrềng dê; lùp bơsram mờng chài dunia dê; mơkung mblàng sền jrô ală broă tờm kwơmàng ngan mờ gam geh uă jơnau đơs krơi is tàm ală rơndăp broă lơh adat.

Bal mờ ai jơnau đơs tă pơgồp gơ wèt mờ tơl rơndăp broă lơh adat in, đơs pơndŭt dơ̆ pơrjum, Thủ tướng Cíñ phủ ồng Phạm Minh Chính sồr ală Ƀộ, gah lơh broă dà lơgar, bơh broă kờp sền, tơn jơh, broă yal ală rơndăp broă lơh, dan lơh adat pal lơh loh ală jơnau cih tàm pơdờn, gàr bè gam ngui tŭ do; lơh loh ală jơnau cih kờñ pal sang tĕ; lơh loh ală jơnau cih kờñ pal tam gơl, bơtơl, ai lơh jăt pa. Thủ tướng tơngkah, tơngai tus, broă lơh lơh adat boh lam rơ̆p kơn jơ̆ kơn jŭt rlau. Cíñ phủ, ală kwang bàng Cíñ phủ pal jơh nùs lơh jăt geh cồng nha bơta tam gơl pa bè lơh mờ lơh sir adat boh lam, tă bơsong uă ngan ală bơta gơkòl, bơta kơryan, lơh geh tơl ală bơta bươn ngan rlau jơh ai làng bol, mpồl lơh sa kă bro in; ai tơl bơta ƀươn jơh ală bơta pràn in ai bơtàu tơnguh lơh sa- mpồl bơtiàn mhar mờ kơ̆ kơl jăp in, pơgồp bơnah lơh jăt geh cồng nha kơnòl broă bơh Đảng, Dà lơgar dê neh sồr lơh.