VOV4.K’ho- Drim ngai 06/09, tàm Hìu duh broă Cíñ phủ, Thủ tướng Cíñ phủ ồng Phạm Minh Chính đơng lam dơ̆ pơrjum Cíñ phủ ờs mờng nhai 08 mờ 08 nhai nam 2022. Đơs tàm dơ̆ pơrjum, Thủ tướng Cíñ phủ ồng Phạm Minh Chính đơs sùm, dơ̆ pơrjum do geh 4 tơngume kwơmàng: sền swì broă nhai 08 mờ 08 nhai do, bơh hơ̆ geh jơnau đơs, yal lài broă gơlik geh, ai tơlik kơnòl broă mờ broă lơh dipal. Thủ tướng sổ pal yal lài di mờ broă gơlik geh nàng ai tơlik kơnòl broă, broă lơh dipal mờ gơtùi lơh jăt ngan ngồn.

Thủ tướng sồr, ală kwang bàng tơnguh uă nùs nhơm geh kơnòl uă, tơrgùm jơh bồ tơngoh jak bơta ngac ngar, bơta mờng chài nàng geh jơnau đơs tă pơgồp “di, rơgeh”, đơs song tơn tàm broă, mblàng sền ală jơnau bơh tài bè lơi mờ gơbàn, ngan là jơnau gơbàn tài bơh ờ gŏ rơcăng lài, bơh hơ̆ ai geh jơnau bơsram nàng tơngai tus lơh niam rlau tai. Broă lơh sa- mpồl bơtiàn nhai 08 mờ 08 nhai bồ nam pơn jăt tai kơ̆ kơl jăp mờ bơtàu tơnguh tàm jơh ală gah broă lơh. Lơh gơlik phan bơh lơh sa mờ măy mok bơtàu tơnguh wơl mhar. Kă bro, drơng broă ala duh hồl, bơtàu tơnguh wơl mhar tàm jơh ală gah. Ală broă lơh sền gròi cau cíñ sac, cau rƀah, cau lơh broă in geh lam lơh jơh nùs mờ geh cồng nha.

Cau mblàng Lơ Mu K’Yến