Thủ tướng sồr, ală tiah pơđơl pràn lơh ngan sền broă bơcri priă lơh phan bơna tàm tiah he dê là bơcri priă ai bơtàu tơnguh in den tàng bè hơ̆ pal lời tŭ tơngai, dà kơlhề pràn ơră nàng sồr lơh; tam tìp, pơndờm pơnđiang ală cau lơh broă bơ̆t bơtàu, bơto pơlam nàng lơh niam. Gơ wèt mờ bàr pe rơndăp broă lơh gơl gùng đah mat tơngai Lik- Mŭt tàm bàr pe tiah, ƀòn lơgar den pal jơh nùs lam lơh mhar.

Bè rơndăp broă lơh gùng Dăk Nông- Bình Phước den pal lam lơh mhar nàng càr Dăk Nông in klàs bơh rƀah mờ càr Bình Phước pal lơh pas. Bè bàr pe kơnòl broă tờm kwơmàng tàm tơngai tus, Thủ tướng đơs loh, pal lơh sir gờñ ală sră nggal gơrềng tus adat boh lam; tàm pơnring priă jền; ngăc ngar, bơnĕ bơnài, bơta lơi gơkòl den dan mờ Quôk hội bơsong; ală tiah bơsong jơh broă sờr ntrờn măt ù jăt tàm nùs nhơm iăt kơno, bơsong jơh ală jơnau ờ suk bơh làng bol dê. Ƀí thư Kâp ủy, Củ tịc Ủy ƀan Ñân zân pal jơh nùs tus lơh bal. Thủ tướng sồr ală tiah rơcăng lài, jơh nùs rlau tàm broă lơh do, lơh geh ù tiah bơtàu tơnguh pa, bal mờ hơ̆ là lơh niam broă lơh rơndăp ù tiah; yal tơngĭt rơndăp ù tiah pa bè ù tiah mờ ală broă ndai.