VOV4.K’ho- Mho ngai 07/04, tàm Hìu duh broă Cíñ phủ, Mpồl đơng lam Ờdo ờdă mờ Lơngăp lơngai internet dà lơgar (hòi lơyah là Mpồl đơng lam) bơyai lơh pơrjum dơ̆ sơnrờp bơh bơta đơng lam bơh Thủ tướng Cíñ phủ ồng Phạm Minh Chính dê, Kwang ătbồ Mpồl đơng lam. Đơs tàm dơ̆ pơrjum, Thủ tướng ồng Phạm Minh Chính pà gĭt, jơh gùt lơgar gam lơh pràn tam gơl sồ, bơ̆t bơtàu Cíñ phủ điện tử, wèt tus Cíñ phủ sồ, mpồl bơtiàn sồ, rài lơh sa sồ, làng bol sồ.

Den tàng bè hơ̆, pal sơlơ tơnguh tai ătbồ dà lơgar; lơh sir kơrnoăt boh lam; đơng lam mờ sồr lơh ring bal bơh hơđang tus hơđơm; pơlam làng bol, mpồl lơh sa kă bro lơh bal; tơnguh tai bơta pràn jak măy mok, priă jền, kòn bơnus nàng sền gàr ờdo ờdă, lơngăp lơngai internet nàng kờñ lơh jăt ngan ngồn gùng dà, jơnau sồr bơh Đảng dê, sền gàr bơta kwơ dà lơgar, jơi bơtiàn, bơta kwơ làng bol, mpồl lơh sa kă bro mờ ală cau tờm geh gơrềng dê. Tàm dơ̆ pơrjum do, ală kwang bàng tàm Mpồl đơng lam neh tơrgùm ai jơnau đơs bè bơta ờdo ờdă, lơngăp lơngai internet dà lơgar tàm tơngai lài mờ yal lài broă gơlik geh tàm tơngai tus; ai jơnau đơs bè cồng nha lơh broă nam 2021 mờ gùng dà lơh broă nam 2022; bàr pe broă tờm, jŏ jòng, kwơmàng bè ờdo ờdă mờ lơngăp lơngai internet dà lơgar.

Cau mblàng Lơ Mu K’Yến