VOV4.K’ho - Drim òr (03/04), tàm hìu lơh broă Cíñ phủ, Thủ tướng Cíñ phủ ồng Phạm Minh Chính đơng lam pơrjum bè broă ai ồs đèng mờ broă ai chah, nhơm ai broă lơh ồs đèng. Đơs tàm dơ̆ pơrjum, Thủ tướng Cíñ phủ ồng Phạm Minh Chính đơs loh, ồs đèng là 1 tàm 5 broă lơh ndrờm bal dờng mờ he pal gàr niam nàng drơng tàm broă brồ guh wơl mhar mờ tơnguh bơtàu lơh sa kơl jăp. Tơngai do, bal mờ broă kờñ tơnguh jăt broă gơguh lơh sa mpồl bơtiàn; tơnơ̆ mờ tŭ tam gơl gùng dà gơdờp bal ờ do ờ dă mờ kòp kovid-19, brồ guh wơl, tơnguh bơtàu lơh sa mpồl bơtiàn, broă kờñ geh năng lượng, mùl màl là broă kờñ ồs đèng tàm lơgar he gam gơguh. Bơdìh hơ̆ tai, broă ai, khà priă năng lượng tàm dunia geh ală tam gơl.

Tàm pơrjum, ală Phó Thủ tướng, ala măt ală ƀộ, gah lơh broă, mpồl lơh broă dà lơgar neh cri bơyai mờ ai geh ală jơnau yal lài; jơnau pơgồp bal ală broă lơh nàng bơsong, tơmù kal ke, tơlòng; ai geh broă pơgồp bal đah ală ƀộ, gah lơh broă, anih lơh broă, mpồl lơh broă nàng gàr niam ồs đèng drơng broă tơnguh bơtàu lơh sa mpồl bơtiàn tàm tơngai tus. Đơs tơn jơh pơrjum, Thủ tướng ồng Phạm Minh Chính sồr pal lơh jăt ală broă lơh nàng ndrờm bal uă bè ồs đèng, năng lượng, bơta tờm là broă đơng lam, pơgồp bal, lơh ndrờm bal, geh cồng nha. Jơnau kờñ là pal gàr niam broă lơh ndrờm bal uă bè ồs đèng mờ năng lượng kơl jăp.

Cau mblàng Ndong Brawl