VOV4.K’ho- Mho ngai 12/09, Thủ tướng Cíñ phủ ồng Phạm Minh Chính đơng lam pơrjum gàr kơ̆ kơ̆ kơljap lơh sa dờng.

Thủ tướng đơs tàm dơ̆ pơrjum

Đơs tàm dơ̆ pơrjum, Thủ tướng sơñio loh 11 mpồl kơnòl broă, gùng dà broă lơh tờm mờ jơnau sồr bañ sền ờ sơ̆p mờ ờ rcang ngăc, gĭt loh bơta gơlik geh tàm dunia mờ tàm lơgar, sơlơ tơnguh bơta pràn mblàng sền sơ wì, yal tơngĭt lài mờ lơh glài, lơh jat kơrnoat boh lam tàm jơnau đơng lam sồr lơh bơh gah lơh sa dờng dê. Pơn jat tai đơng lam rcang lài, ngăc ngar, geh cồng nha mờ pơgồp bal niam, dùl ròt bal đah broă lơh priă jền, broă lơh nam priă jền mờ ală broă lơh ndai nàng gròi sền bơta roh bơngă khà priă, kơ̆ kơljap lơh sa dờng, sơlơ gơguh lơh sa, gàr niam ală bơta tàm pơn ring dờng bơh rài lơh sa dê. Đơng lam sồr lơh di broă, di anih, sền gĭt loh jơnau kờñ, jơnau sồr, phan drơng broă lơh mờ gùng dà broă lơh di pal, gàr niam geh cồng nha bal mờ bơta ring bal, di pal đah ală jơnau kờñ, bơta kwơ tềng đap mat mờ jŏ jòng, tài bơta bơtàu tơnguh kơ̆ kơljap bơh rài lơh sa dê.

Cau mblàng K’Hạnh