VOV4.K’ho - Ngai òr (03/03), tàm hìu lơh broă Cíñ phủ, Thủ tướng Cíñ phủ ồng Phạm Minh Chính đơng lam pơrjum Cíñ phủ bè ờs nhai 2 nam 2022. Jăt jơnau yal tàm pơrjum, bơta lơh sa mpồl bơtiàn nhai 2 mờ 2 nhai bồ nam pơn jăt tai geh tam gơl niam, pơn jăt tai brồ guh tàm jơh ală gah broă, tàm hơ̆ geh bal lơh sa mờ măi mŏk, lơh sa suơn sre, broă lơh drơng ala, brồ guh drà kă bro lơh broă, gàr ring niam cíñ trị, gàr niam bơta ờ do ờ dă mpồl bơtiàn.

                                                      Cíñ phủ pơrjum bè ờs nhai 2

Bè kơnòl broă lơh tàm tơngai tus, Thủ tướng đơs loh, do là tŭ kwơ màng, pal chồl mhar mờ lơh geh cồng nha ală broă lơh nàng ai geh bơnàng jă tàm broă lơh jăt ală jơnau kờñ bơh gùt nam. Thủ tướng sồr ală ƀộ, anih lơh broă, ală càr, ƀòn dờng lơh jăt di pal kơnòl, lơh pràn broă lơh jăt mờ lơh gơs uă ngan ală jơnau kờñ, khà broă tơnguh bơtàu lơh sa mpồl bơtiàn nam 2022 neh geh ai tàm hơ̆ tơrgùm lơh gơs ală rơndăp broă yal Ƀộ Cíñ trị, Ƀan Ƀí thư, gàr bơta niam, tơngai lơh broă. Pơn jăt tai lơh jăt geh cồng nha ală kơnòl, broă lơh bơh broă brồ guh mờ tơnguh bơtàu lơh sa, tàm hơ̆ uă ngan là kơnòl pal lơh jăt quý I nam 2022.

Cau mblàng Ndong Brawl