VOV4.K’ho- Mho ngai 14/07, tàm Hìu duh broă Cíñ phủ, Thủ tướng Cíñ phủ ồng Phạm Minh Chính đơng lam Pơrjum bơtàu tơnguh drà tăc blơi ù tiah hìu đam ờdo ờdă, niam bơnĕ, kơ̆ kơl jăp jŏ jòng. Pơrjum geh bơyai lơh jăt broă lơh pờ tơlik tơn tàm internet đah Hìu duh broă Cíñ phủ mờ Ủy ƀan Ñân zân 5 ƀòn dờng gơwèt Dà lơgar, tàm hơ̆ geh: Hà Nội, ƀòn dờng Hồ Chí Minh, Đà Nẵng, Hải Phòng, Cần Thơ. Tàm pơrjum, ală kwang bàng tơrgùm cribơyai sền swì mờ yal lài drà tăc bro ù tiah hìu đam Việt Nam, sồr pơlam gùng dà, broă lơh bè rơndăp tăp sèng phan bơna mờ anih tăc nàng drà tăc blơi ù tiah hìu đam bơtàu tơnguh ờdo ờdă, niam bơnĕ, kơ̆ kơl jăp jŏ jòng.

Đơs tàm pơrjum, Thủ tướng ồng Phạm Minh Chính sồr ală ƀộ, ngàñ, ală tiah gĭt nền broă bơtàu tơnguh drà tăc blơi ù tiah hìu đam, tàm pơnring jơnau kờñ tăc mờ jơnau kờñ blơi, lơh geh anih niam bơnĕ, tàm hơ̆ ai lài đah lời ai ờdo ờdă rài kis mpồl bơtiàn in; sền dờng màng bơta pal jăt drà kă bro dê mơya pal geh gơnoar broă ătbồ bơh Dà lơgar dê, ờ gŏ di lời bơta ờ niam, ătbồ mờ lơh gơrềng drà kă bro.

Cau mblàng Lơ Mu K’Yến