Nhai 4 mờ 4 nhai bồ nam, Cíñ phủ, ală ƀộ, gah lơh broă, ală càr, ƀòn dờng neh lơh jăt di pal ală jơnau kờñ; đơng lam, lam lơh mờ lơh jăt nền nòn ală kơnòl, broă lơh neh geh ai. Tàm pơrjum do, ală kwang bàng tàm Cíñ phủ neh cri bơyai song dơ pă tơrgùm tàm broă bè tơnguh bơtàu lơh sa mpồl bơtiàn nhai 4 mờ 4 nhai bồ nam, gùng dà, broă lơh, kơnòl tờm tàm nhai 5 mờ tơngai tus bal mờ ờ uă tơngu me kwơ màng ndai bè broă bơcri priă dà lơgar, Broă brồ guh wơl mờ tơnguh bơtàu lơh sa mpồl bơtiàn, 03 broă lơh jăt jơnau kờñ dà lơgar dê.

Đơs tàm dơ̆ pơn dŭt pơrjum, Thủ tướng ồng Phạm Minh Chính sồr, geh lơh jăt nền nòn sùm, ring niam lơh sa dờng, sền gròi phan kă bro gơguh priă, lơh pràn broă gơguh lơh sa, gàr niam ală bơta ndrờm bal dờng bơh lơh sa dê; sền gròi ală bơta niam chài, mpồl bơtiàn; tơnguh sền gàr dà lơgar, bơta lơngăp lơngai; tơnguh broă lơh bal mờ lơgar ndai, tơrgùm bal dunia mờ lơh pràn broă yal tơngit, mblàng jơnau, ai geh jơnau ring bal tàm mpồl bơtiàn. Tơrgùm dong kờl mờ lơh pràn broă lơh sa kă bro, 3 bơta pràn jŏ jòng, 3 bơta pràn gơguh lơh sa, ai geh broă lơh sa mờ rài kis lơh sa làng bol in.