VOV4.K’ho - Pơrjum Cíñ phủ jăt tơngu me adăt boh lam nhai 1 nam 2022 geh bơyai lơh tàm drim òr (19/01). Đơs tàm pơrjum, Thủ tướng Cíñ phủ ồng Phạm Minh Chính sồr, ală Ƀộ trưởng, Kwang atbồ gah lơh broă pal đơng lam broă bơ̆t bơtàu mờ lơh gơs thể cế, ờ ai gơnoar kấp phó in tàm gah broă do, pah nhai pal đơng lam sền wơl ală broă gơtìp kal ke, pal bơsong, ală broă pa, broă hòi jà mhar, gơlik geh tàm broă đơng lam, lam sồr ală broă ờ hềt geh kơrnoăt ai ha là neh geh kơrnoăt ai mơya mùl màl neh rơlao.

Tơngai do, Cíñ phủ, Thủ tướng Cíñ phủ neh sền gròi ngan tus mờ broă bơ̆t bơtàu mờ lơh gơs thể cế-do là dùl tàm 3 broă lơh pràn jŏ jòng jăt ală nghị quyết pơrjum dờng Đảng gùt lơgar. Tàm pơrjum do, ală kwang bàng cri bơyai bè rơndăp broă adăt gùng lòt ù gờl (tam gơl); Rơndăp broă adăt gàr niam ờ do ờ dă tàm gùng lòt ù gờl; Rơndăp broă adăt mpồl tus bal sền gàr bơta lơngăp lơngai, ờ do ờ dă tàm tiah ƀòn mờ ờ uă rơndăp broă adăt kuơ màng ndai.

Cau mblàng Ndong Brawl