Bơh bồ nam 2024, Cíñ phủ neh bơyai lơh 02 dơ̆ pơrjum mìng dùl tơngume, sền sơ wì, tă pơgồp jơnau đơs gơwèt mờ 14 rơndăp broă lơh adat, kơrnoat, Nghị quyết. Broă lơh bơt bơtàu, ai lơh jat adat boh lam ngai sơlơ geh lơh jat niam ngan, jak chài ngan, lơh broă ờs mờng, tam gơl pa mờ geh cồng nha rlau tai.

Bal mờ lơh ală adat, ală Ƀộ, ngàñ, Thủ tướng sồr pal tơrgùm lơh ală Nghị địñ, Thông tư nàng lơh ngan ngồn ală adat. Tàm hơ̆, pal tơrgùm lơh ală Nghị địñ, Thông tư tàm nhai 05/2024 nàng yal mờ kấp geh gơnăp gơnoar in, gờñ lam lơh jat ală adat. Thủ tướng sồr tàm pơrjum do, ală kwang bàng Cíñ phủ tơrgùm bồ tơngoh, pơn jat tai nùs nhơm tam gơl pa; yal jơnau yal, jơnau đơs tă pơgồp jơnau đơs lơyah, loh làng jơnau kờñ đơs, lòt song tàm broă; tơrgùm cribơyai bè ală broă tơngume pa, gam “kòl yan”, kwơ màng, geh jơnau đơs ndai kờñ cribơyai, dan jơnau đơs bơh Cíñ phủ dê, gàr niam tŭ tơngai, bơta geh cồng nha bơh dơ̆ pơrjum dê.