VOV4.K’ho- Drim ngai 27/4, tàm Hìu lơh broă Cíñ phủ, Thủ tướng Cíñ phủ ồng Phạm Minh Chính neh đơng lam pơrjum dơ̆ 2 bơh Ủy ƀan dà lơgar bè tam gơl sồ. Pơrjum geh pờ tơlik tơn tàm internet tus 63 càr, ƀòn dờng tàm gùt lơgar. Đơs tàm dơ̆ pơrjum, Thủ tướng Phạm Minh Chính đơs nền, tam gơl sồ dà lơgar là dùl kơnòl kuơmàng ngan, gơ jat bal mờ 3 tơngume tờm hơ̆ là Cíñ phủ sồ, rài lơh sa mờ mpồl bơtiàn sồ. Đảng, dà lơgar, Cíñ phủ, Thủ tướng Cíñ phủ sền gròi uă ngan tus broă lơh tam gơl sồ, wèt tus Cíñ phủ sồ, rài lơh sa sồ, mpồl bơtiàn sồ, làng bol sồ.

Thủ tướng sồr pal kờp sền wơl thể cế tài bơh do là 1 tàm 3 bơta tam gơl dờng màng ngan tàm broă tam gơl gơs thể cế; bơ tơl, lơh sir thể cế pal geh phan bơna kông nghệ, ngan là phan bơna kông nghệ thông tin, bơtàu tơnguh kông nghệ sồ, ngui kông nghệ sồ; pal hòi jà gơtùi bơta tă pơgồp priă jền; sơlơ lơh broă bal đah dà lơgar mờ cau dùl nă să is, hòi jà bơta tă pơgồp bơh làng bol dê. Broă geh ai tơlik là pal đơng pơlam bè lơi nàng tam gơl sồ ờ mìng pa, mờ gam pal dipal mờ broă gơlik geh, tŭ tơngai, rài lơh sa, pràn jak; mờ kung tơnguh bơta niam cau lơh broă.

Cau mblàng K’Duẩn