Tàm pơrjum, Thủ tướng Phạm Minh Chính pà git, tàm tơngai lơh broă bơh nam 2021 tus nam 2026, Dà lơgar ai 400 rbô tơmàn đông ai broă lơh gùng lòt in. Do là khà broă lơh dờng ngan. Ală broă lơh, rơndap broă geh tam pà lam uă bơh tiah đah jum tus tiah đah tô dà lơgar, mờ ală rơndap broă lơh gùng lòt tiah đah tô- tiah đah jum dà lơgar, tiah đah mat tơngai lik- tiah đah mat tơngai mut mờ tàm tơrbŏ bal 6 tiah lơh sa- mpồl bơtiàn. Den tàng, Mpồl đơng lam pal sùm kờp sền, sền sơ wì, sồr lơh nàng lơh gơs kơnòl broă ai tơlik.

Thủ tướng pà git, tŭ do dà lơgar neh ai priă bơcri; geh ală mpồl lơh broă, broă dong kờl; jơh nùs tă bơsong ală kal ke, kòl yan; bơta sồr lơh ală broă lơh, rơndap broă gơ ơm tàm broă lam lơh. Thủ tướng sồr ală kwang bàng tàm Mpồl đơng lam, kwang đơng lam bồ ală Ƀộ, gah broă lơh dà lơgar, ală càr, ƀòn dờng tơnguh nùs nhơm, kơnòl broă tềng đap Đảng, dà lơgar, làng bol, lơh krơh lài, jơh nùs, rơcang lài, ngac ngar tàm broă sồr lơh, đơng lam; rơcang sơndră broă ờ niam, sa kuề sa kuà… tàm broă lam lơh ală broă lơh, rơndap broă kuơmàng dà lơgar, broă lơh tờm gah Giao thông vận tải.