Mho ngai 12/7, Thủ tướng Cíñ phủ ồng Phạm Minh Chính, Củ tịc Ủy ƀan dà lơgar bè tam gơl sồ neh đơng lam pơrjum dơ̆ 6 bơh Ủy ƀan mờ Pơrjum sền wơl broă lơh 6 nhai bồ nam mờ lam lơh kơnòl broă 6 nhai lồi nam 2023 bè tam gơl sồ dà lơgar mờ Rơndap broă lơh tơnguh ngui yal tơnggit jơnau bè làng bol ơm kis, yal mat sơnđan mờ đơs nền jơnau tơnggit tàm điện tử drơng tam gơl sồ dà lơgar tơngai bơh nam 2022 tus nam 2025, broă wèt sền tus nam 2030 (Rơndap broă sồ 06) bơh Cíñ phủ dê.

Tàm tơngai tus Thủ tướng sồr, tam gơl sồ dà lơgar pal lam lơh dùl bă tơrgùm bal, wil tơl mơya pal gròi sền lài tus bơta niam rlau mờ khà lơh geh; gròi sền lài tus bơtàu tơnguh ală bơta yal tơnggit jơnau ngan là anih prap jơnau tơnggit tàm điện tử dà lơgar dê; lơh lài broă gàr lơngăp lơngai tàm internet, lơngăp lơngai yal tơnggit jơnau. Thủ tướng đơs nền, bơt bơtàu, tơnguh ală broă lơh làng bol sồ pal là dùl bơnàng jă kuơmàng bơh tam gơl sồ dà lơgar dê, dùl bơnah ờ gơtùi tam cah tàm rài kis lơh sa, mpồl bơtiàn. Thủ tướng đơs loh, pal ndrờm bal bơta kuơ đah dà lơgar, làng bol; mơya pal lam lơh dùl bă niam chài, di nùs làng bol nàng làng bol mờ mpồl lơh sa kă bro ring bal, jơh nùs tus bal.