Đơs tàm pơrjum, Thủ tướng ồng Phạm Minh Chính đơs sùm, nam 2024- nam bơtàu tơnguh mhar tàm broă lơh jat Broă rơndăp lơh bơtàu tơnguh lơh sa- mpồl bơtiàn 5 nam bơh nam 2021-2025, tàm hơ̆, tơrgùm tàm broă sơlơ tơnguh mờ tàm ntrờn rơndăp tăp sèng rài lơh sa; lơh pràn tam gơl sồ Dà lơgar; bơtàu tơnguh Cíñ phủ sồ, lơh sa sồ, mpồl bơtiàn sồ, làng bol sồ; Sền gròi 03 broă bơtàu tơnguh mhar kwơ màng, tàm hơ̆ geh: kơrnoat boh lam, mpồl cau lơh broă, ngan là mpồl cau lơh broă jak, tàm hơ̆ tờm ngan là mpồl cau lơh broă drơng tam gơl sồ; Rơndăp tăp sèng phan bơna bơt bơtàu, tàm hơ̆ geh phan bơna bơt bơtàu sồ. Thủ tướng đơs nền, tam gơl sồ là dùl kơnòl broă tờm, broă lơh bơtàu tơnguh mhar tàm broă lơh jat ală jơnau kờñ bơtàu tơnguh lơh sa- mpồl bơtiàn.

Tàm pơrjum do, Thủ tướng sồr ală kwang bàng tơrgùm cribơyai, sền sơ wì bơta lam lơh broă lơh tam gơl sồ Dà lơgar mờ tờm ngan là bơtàu tơnguh lơh sa sồ, ală cồng nha neh lơh geh, bơta ờ hềt lơh geh, bơta ờ hềt pràn, ală broă lơh tờm nàng lơh jat uă ngan rlau jơh kơnòl broă neh geh ai tàm Broă rơndăp lơh broă lơh nam 2024 bơh Ủy ƀan Dà lơgar bè tam gơl sồ.