Tàm pơrjum do, ală kwang bàng neh song dơ pă yal cồng nha, jơnau bơsram mờng chài mờ ală bơta gam gơkòl, ờ hềt dipal bè ală sră nggal adat boh lam gam uă bơta kòl yan kal ke, ngan là blơi, tàm pơrlòng giă, lơh sa kă bro lơh bal, ătbồ, ngui jơtài dà lơgar. Pràn jak bơh ală anih lơh sơnơm kơnă hơđơm dê, lơh sơnơm rơcăng gàr lài dê gam ờ hềt dipal; bơta hat hal ir cau kòp tàm ală hìu sơnơm dờng ờ hềt geh bơsong. Đơs tàm pơrjum, Thủ tướng Cíñ phủ ồng Phạm Minh Chính jờng rơ ală cồng nha mờ gah lơh sơnơm neh lơh geh tàm tơngai lài, pơyua jơnau nting bơr gờm chờ niam bơnĕ ngan rlau jơh tus mờ jơh gùt gah lơh sơnơm di ngai 27/02. Tàm tơngai tus, Thủ tướng sồr gah lơh sơnơm pơn jăt tai đòm jăt bơhiàn pơnrơ ngan, lơh jăt gơtùi ală gùng dà, broă lơh, adat boh lam, jơnau sồr bơh Đảng dê bè sền gàr, dong kờl, tơnguh uă pràn kơldang să jan làng bol dê mờ broă lơh khà kờp làng bol tàm bơta pa. Thủ tướng kung yal loh ală bơta gam gơkòl ờ hềt dipal, bơta kal ke bơta lòng kờñ pal kràñ cê jơh nùs lơh broă nàng bơsong.