Pơrjum geh bơyai lơh jăt broă lơh pờ tơlik tơn tàm internet tàm anih pờ Hìu duh broă Cíñ phủ dê mờ anih pờ 9 càr geh rơndăp broă lòt gan. Tàm dơ̆ pơrjum, kwang đơng lam bồ ƀộ, gah lơh broă dà lơgar, ală tiah, ală anih lơh broă geh gơrềng yal broă lam lơh ală rơndăp broă lơh; yal ală kal ke, bơta gơkòl; sồr geh ală kơnòl broă, broă lơh nàng ală rơndăp broă lơh geh lam lơh ƀươn rlau tai.

Đơs pơndŭt dơ̆ pơrjum, Thủ tướng Cíñ phủ ồng Phạm Minh Chính đơs wih đơs wơl, ală anih lơh broă, ală tiah, ală mpồl pơgồp bal niam mờ gơ̆p mờ bal mờ làng bol, mpồl lơh sa kă bro tài jơnau kờñ bal, pleh lơh lơngah lơngañ, ờ niam, sa kwì sa kwà tàm ală tŭ lam lơh rơndăp broă lơh, jăt tàm nùs nhơm “iăt kơno, tam pà, lơh broă”, “lơh bal, jai bal mờ sa bal”. Ală tiah mhar ai ù lơh rơndăp broă lơh, jàu ù gah kềng nàng cau tờm bơcri priă in lơh broă lơh rơsìh, dŏ che lam; mhar pal ntrờn ơm kis pa mờ lơh ală broă lơh ntrờn ơm kis wơl ai ală hìu làng bol in, gàr niam lơngăp lơngai kềng gah gùng che đèng nàng pờ đèng broă lơh bơ̆t bơtàu tàm nhai 6 nam 2024.