Tàm pơrjum, Thủ tướng ồng Phạm Minh Chính ngoh rơngac pơyua jơnau lùp còp, tam pà bal moat jrùm bơh Ƀộ Cíñ trị, Ƀan Ƀí thư, Tổng Ƀí thư, Củ tịc lơgar ồng Tô Lâm mờ bơh kwang đơng lam bồ Đảng, dà lơgar dê tus ală anih lơh broă, càr, ƀòn dờng, mpồl lơh broă mờ ngan là ală hìu bơnhă geh cau chơt, roh thit, sồt să tài càl rbut dờng sồ 3 lơh gơbàn.

Thủ tướng pà git, mờ nùs nhơm tàm kờñ gơboh bal kòn bơnus, nha ngan glòm nha sèt, Anih duh broă Mặt trận dà lơgar Việt Nam neh lam lơh dong kờl làng bol gơtìp hoàc huơr tài càl rbut dờng sồ 3 lơh gơbàn, mờ kờp jơh khà priă tă pơgồp tus tŭ do là rlau 1 rbô tơmàn đông. Cíñ phủ neh dong kờl ală càr, ƀòn dờng in rlau 350 tơmàn đông, 300 tấn phe… mờ gam pơn jat tai tơrgùm kờp nàng dong kờl. Thủ tướng đơs nền, bòl he pal jơh nùs lam lơh ală broă lơh bơsong jơnau gơ lời wơl bơh càl rbut dờng sồ 3 dê tài nùs nhơm jơi bơtiàn, nùs nhơm làng bol, tài rài kis bơh làng bol dê mờ jơnau kờñ là: ờ lời làng bol lơi pal ờ tơl sa, ờ tơl soh, gơtìp jơgloh, gơtìp noat mrềt, ờ tơl dà sàng goh, ờ geh anih ơm, ală phan ngui sa pal geh pah ngai.