Tàm pơrjum dơ̆ 12 Mpồl Sồr lơh dê, Thủ tướng ồng Phạm Minh Chính  neh jào 57 kơnòl broă ai ală ƀộ, anih lơh broă dà lơgar, ală càr, ƀòn dờng in, tàm hơ̆ geh 11 kơnòl broă geh tơngai. Mờ Thủ tướng Cíñ phủ, ală Phó Thủ tướng neh geh 12 pang sră đơng lam lơh jăt ală kơnòl broă gơrềng bal ală rơndăp broă, broă lơh.

Thủ tướng pà git, geh ờ uă kơnòl broă gam lơh jăt ờ hềt lơh gơs, pal pơn jăt tai lơh ngan, lơh pràn nàng lơh geh jơnau kờñ neh geh ai, chờ gờm pơrjum dờng Đảng ală kấp, wèt tus Pơrjum dờng Đảng gùt lơgar dơ̆ XIV, tơnkah 80 nam Ngai crơng gơs dà lơgar, 50 nam Ngai tơnklàs đah jum Dà lơgar tơrgùm bal. Thủ tướng Cíñ phủ sồr ală kwang bàng tàm Mpồl đơng lam, ală kwang bàng tus pơrjum tơrgùm sền wơl, sền nền nòn ală kơnòl broă neh geh jào mờ bơsong, lam lơh, bơsong ală kal ke gơkòl, lơh pràn broă lơh tàm ală rơndăp broă lơh tàm tơngai tus.