Drim ngai 03/04, tàm Hìu lơh broă Cíñ phủ, Thủ tướng Cíñ phủ ồng Phạm Minh Chính đơng lam Pơrjum pờ tơlik tơn tàm internet Cíñ phủ mờ ală tiah nhai 03 nam 2023 nàng sền bal wơl bơta lam lơh Jơnau đơs pơndŭt bơh Dà lơgar, Nghị quyết bơh Quôk hội dê, tờm ngan là cribơyai bơta lơh sa- mpồl bơtiàn nhai 03 mờ 3 nhai nam 2023, bơta lam lơh jat Nghị quyết sồ 01 bơh Cíñ phủ dê, Broă lơh bơtàu tơnguh wơl mờ bơtàu tơnguh lơh sa- mpồl bơtiàn, 03 broă lơh jơnau kờñ dà lơgar; bơta tam pà, ai priă bơcri dà lơgar.

Bè kơnòl broă, gùng dà broă lơh tờm tàm tơngai tus, Thủ tướng sồr lam lơh jat niam, geh cồng nha ală Nghị quyết, jơnau đơs pơndŭt bơh Đảng Dà lơgar, Ƀộ Cíñ trị, Ƀan Ƀí thư, Kwang đơng lam bồ tờm, Quôk hội, Cíñ phủ, Thủ tướng Cíñ phủ dê. Gàr geh bơta niam, tŭ tơngai ală rơndap broă lơh, tơngume yal tàm Pơrjum Dà lơgar dơ̆ 7 mờ pơrjum dơ̆ 5 Quôk hội khoă XV dê. Pơn jat tai lài ngan gàr niam kơ̆ kơl jap lơh sa dờng, gròi sền roh giă priă, sơlơ tơnguh gơguh lơh sa, gàr niam bơta tàm pơnring bal dờng. Lơh pràn lơh sa kă bro, lơh geh broă lơh, rài kis lơh broă sa ai làng bol in.