VOV4.K’ho- Drim ngai 14/9, tàm Hà Nội, Thủ tướng Cíñ phủ ồng Phạm Minh Chính đơng lam Pơrjum sền sơ wì rơndap ù tiah tơrgùm jơh ală bơta dà lơgar tơngai bơh nam 2021 tus nam 2030, broă wèt sền tus nam 2050. Đơs đơng lam tàm pơrjum, Thủ tướng Phạm Minh Chính đơs nền, broă lơh rơndap ù tiah geh kuơ dờng màng ngan. Rơndap ù tiah tơrgùm jơh ală bơta dà lơgar do kuơmàng ngan, lam lơh jat ngan ngồn gùng dà pơrjum dờng dơ̆ 13 bơh Đảng dê, lam lơh jat ngan ngồn kơrnuat bơt bơtàu dà lơgar tàm tŭ tơngai brồ guh tus Củ nghĩa xã hội, ală Nghị quyết ờs mờng bơh Đảng dà lơgar dê, ngan là Nghị quyết pơrjum dờng dơ̆ 13 bơh Đảng dê.

Thủ tướng Phạm Minh Chính đơs tàm pơrjum sền sơ wì rơndap ù tiah tơrgùm jơh ală bơta dà lơgar

Do là dơ̆ sơn rờp, Việt Nam lam lơh rơndap ù tiah kâp dà lơgar nàng kờñ sền sơ wì wơl bơta geh ngan dùl bă mùl màl, tơrgùm jơh ală bơta, bơh hơ̆ sồr pơlam gùng dà ai, rơndap tap sèng wơl ù tiah bơtàu tơnguh dà lơgar dê, lơh gơlik ù tiah bơtàu tơnguh pa, tŭ niam bơtàu tơnguh pa, bơta pràn chul chồl bơtàu tơnguh pa nàng lơh geh jơnau kờñ, bơta kơp gơn mờ Nghị quyết pơrjum dờng dơ̆ 13 bơh Đảng dê neh đal git, tus nam 2045 gơ gơs lơgar bơtàu tơnguh, priă jền lơh geh uă.

Cau mblàng K’Duẩn