VOV4.K’ho - Drim òr (01/07), tàm càr Dăk Lăk, Thủ tướng Cíñ phủ ồng Phạm Minh Chính đơng lam pơrjum tơn jơh broă lơh jăt Nghị quyết sồ 10 ngai 18 nhai 01 nam 2002 mờ Jơnau đơs pơn dŭt sồ 12 ngai 24 nhai 10 nam 2011 bơh Ƀộ Cíñ trị dê bè tơnguh bơtàu lơh sa mpồl bơtiàn mờ sền gàr niam bơta lơngăp lơngai dà lơgar tiah Tây Nguyên.

                                   Thủ tướng Cíñ phủ ồng Phạm Minh Chính đơng lam pơrjum

Tàm pơrjum, ală kwang bàng neh tơrgùm cri bơyai, sền wơl bơta mùl màl broă lam lơh jăt mờ cồng nha neh lơh geh, broă gam ờ pràn mờ bơta tờm tơnơ̆ mờ 20 nam lơh jăt Nghị quyết sồ 10 mờ Jơnau đơs pơn dŭt sồ 12; ai geh gơnoar, bơta niam, bơta kwơ màng mờ bơta gơrềng bal bơh tiah Tây Nguyên dê gơwèt mờ broă tơnguh bơtàu lơh sa mpồl bơtiàn, sền gàr bơta lơngăp lơngai dà lơgar tàm tiah do mờ tiah Đông Nam Ƀộ, tiah jăt gah dà lềng đah jum tàm gùl lơgar, tiah 3 mum tơnguh bơtàu đah lơgar Việt Nam – Lào – Campuchia mờ gùt lơgar; ... Đơs tàm pơrjum, Thủ tướng Cíñ phủ ồng Phạm Minh Chính neh mblàng ală tŭ pràn, bơta niam geh pơnrơ mờ kung ai tơngŏ loh làng ală broă lơh gam ờ hềt pràn, kal ke. Thủ tướng đơs tờm: Tơnguh bơtàu tiah Tây Nguyên pal tơrgùm mờ pơgồp bal bơsong ndrờm bal jơh bè cíñ trị, nùs nhơm, lơh sa, mpồl bơtiàn, tiah kis, sền gàr bơta lơngăp lơngai dà lơgar; pơgồp bal broă tơnguh bơtàu lơh sa mờ bơsong ală broă mpồl bơtiàn, bơta ờs mờng kăc màng, bồ tơngoh, nùs nhơm kờñ brồ guh, lơh is, bơta pràn is, tam klăc bal gơs bơta pràn tơnguh bơtàu.

Cau mblàng Ndong Brawl