Ală ngai do, tàm ờ uă càr, ƀòn dờng đah jum dà lơgar mờ Tây Nguyên neh gơlik mìu dờng, tơrlah ù, gơbam dà tàm ờ uă tiah, lơh gơrềng ờ niam uă ngan tus mờ gùng lòt bal mờ rài kis làng bol; tàm hơ̆ uă ngan tàm gơl gùng 20 gơl lòt gan koèl kơh Bảo Lộc neh gơtìp tơrlah ù lơh 03 nă cau ling kảñ sát sền gàr gùng lòt mờ 01 nă làng bol gơtìp ù bồr. Thủ tướng Cíñ phủ pơyoa jơnau còp să, tam pà jơnau moăt uă ngan tus mờ cau pròc mhàm geh cau gơtìp rềs àr. Thủ tướng Cíñ phủ sồr Mpồl đơng lam dà lơgar bè sơndră mờ rềs àr bơh trồ tiah mờ Ủy ƀan dà lơgar rơcang sơndră mờ bơta gơlik geh, rềs àr bơh trồ tiah mờ jòi dong klàs cau gơtìp rềs àr, ală Ƀộ trưởng, Củ tịc UɃÑZ ală càr rơcang đơng lam, lơh jăt nền nòn, di tŭ, geh cồng nha broă rơcang sơndră mờ tơmù hoàc huơr bơh trồ tiah lơh aniai, gàr niam màng kis mờ phan bơna làng bol in.

Tus mờr 11 jiơ mang ngai 30 nhai 07, mpồl lơh broă geh gơnoar càr Lâm Đồng neh jòi gŏ 3 ƀồc cau gơtìp rềp àr gam wơl tàm dơ̆ tơrlah ù tàm koèl kơh Bảo Lộc. Bè hơ̆, ƀồc bơh 4 nă cau gơtìp gơ bồr tàm dơ̆ tơrlah ù gơlik geh tàm koèl kơh Bảo Lộc neh geh mpồl lơh broă geh gơnoar càr Lâm Đồng dê jòi gŏ. Tài bơh mìu dờng jŏ jòng lơh gơlik uă tiah tơrlah ù tàm koèl kơh Bảo Lộc mờ jăt kềng gah gơl gùng dờng 20. Tàm tŭ 2 jiơ nggùl mho, tàm tŭ gam lơh kơnòl broă lòt sền, tam pà gùng lòt mờ tus bal bơsong ală tiah tơrlah ù nàng kờñ gàr niam lơngap lơngai gùng lòt rê, nisơna gơlik geh dơ̆ tơrlah ù kơn jơ̆ ngan lơh 3 nă ling Kảñ sát gùng lòt mờ dùl nă làng bol gơtìp tơ̆p bồr.

Tơnơ̆ tŭ gơlik geh broă do, kwang đơng lam bồ càr Lâm Đồng neh geh mat tàm tiah tơrlah ù đơng lam ală mpồl lơh broă geh gơnoar ai rlau 300 nă cau bal mờ uă rơndeh rơndồ măi mok lam lơh broă lơh dong kờl mờ jòi dong kờl cau gơtìp rềs àr.

Tàm kơnhoàl Ea Súp mờ kơnhoàl Lăk, càr Dăk Lăk dê, ală ngai do kung gơlik geh mìu dờng jŏ ngai, lơh gơbam dà tàm uă bă sre kòi, phan tam ờ jŏ tơngai làng bol dê mờ uă gơl gùng lơh gơtìp koh gơl. Mùl màl tàm kơnhoàl Lăk, mìu dờng dà tih neh lơh gơbam rơlao 750 lồ kòi sre bơh ală hìu làng bol tàm ală xã Buôn Tría, Buôn Triết, Đăk Liêng mờ ờ uă xã, thị trấn ndai.

Tàm hơ̆, xã Buôn Triết gơtìp uă ngan mờ rơlao 320 lồ, xã Dăk Liêng là 268 lồ, xã Buôn Tría là 106 lồ, gam tai là bơh ală xã Yang Tao, Bông Krang mờ thị trấn Liên Sơn. Gam tàm kơnhoàl tiah nhàr dà lơgar Ea Súp, mìu dờng jŏ ngai tàm ală ngai do kung neh lơh uă gơl gùng lòt tus tàm ală ƀòn, xã tàm ală xã Ea Lê, Ea Rốk, Ea Bung... gơtìp gơbam dà, uă bă sre kòi, phan tam ờ jŏ tơngai gơtìp gơbam dà. Gơnoar atbồ bal mờ gah lơh broă geh gơnoar ală kơnhoàl tàm càr Dăk Lăk neh rơcang lơh jăt ală broă nàng rơcang sơndră mờ mìu dờng dà tih dà cò.