Jơh ală jơnau đơs tă pơgồp tàm pơrjum ndrờm ring bal đơs là, khà gơguh GDP 8,02% nam 2022 là niam ngan. GDP kờp bal dùl nă cau nam 2022 ndrờm mờ 4 rbô 110 dolar Mỹ, gơguh 393 dolar Mỹ pơndrờm mờ nam 2021.

Đơs pơndŭt pơrjum, Thủ tướng Cíñ phủ ồng Phạm Minh Chính đơs nền, ală cồng nha lơh geh bơh nam 2022 dê jơnhoa rlau mờ nam 2021 là cơng tàng ai gŏ bơta pràn tam klăc dờng jơh gùt jơi bơtiàn, bơta tơrgùm bal pràn, dùl nùs bal, jơnau kơ̆p kờñ jơh nùs lơh ngan bơh jơh ală anih lơh broă cíñ trị mờ làng bol jơh gùt lơgar dê bơh bơta đơng lam bơh Đảng dê. Nàng lơh geh jơnau kờñ, kơnòl broă bơtàu tơnguh lơh sa- mpồl bơtiàn nam 2023 jăt Kơrnoăt Quôk hội dê, tàm pơrjum pờ tơn tàm internet bơh Cíñ phủ mờ ală tiah dê tơn jơh broă lơh nam 2022, lam lơh broă rơndăp lơh bơtàu tơnguh lơh sa- mpồl bơtiàn nam 2023; Cíñ phủ neh geh 6 jơnau, broă tờm sồr lơh đơng lam mờ 11 mpồl kơnòl broă, gùng dà broă lơh tờm bơtàu tơnguh lơh sa- mpồl bơtiàn nam 2023.