VOV4.K’ho- Mang ngai 27/02, Thủ tướng Cíñ phủ ồng Phạm Minh Chính tus bal mờ đơs tàm Broă lơh tơngkah Ngai cau lơh sơnơm Việt Nam 27/02 “Cau ling àu kò”. Thủ tướng Cíñ phủ ồng Phạm Minh Chính ala mat kwang đơng lam bồ Đảng, dà lơgar pơyua jơnau nting bơr gờm chờ jơh nùs, jơnau ưn ngài uă ngan tus cau lơh sơnơm tàm gùt lơgar, ală cau pơn jat tai cih gơs nùs nhơm kuơmàng bơh gah lơh sơnơm dê; ngan là tŭ jơh gùt jơi bơtiàn he sơrlèt gan kal ke, kơ̆ dơn, khin cha jak chài, tam klac bal sơndră wơl kòp Kovid-19.

Thủ tướng đơs nền, kwang đơng lam bồ Đảng, dà lơgar, ală mpồl duh broă Đảng mờ gơnoar atbồ ală kấp bal mờ jơh gùt làng bol sùm đơs niam, git wă mờ tam pà mờ ală kal ke, bòl glar, bơta phi să bơh gah lơh sơnơm, bák sĩ, cau lơh sơnơm dê. Thủ tướng sồr ală kấp, ală gah broă lơh, ală tiah mờ hòi jà làng bol gùt lơgar pơn jat tai tơrgùm uă ngan ai broă lơh cit sơnơm vaccine in, tàm hơ̆ tơnguh broă cit sơnơm vaccine ai kơnòm dềt in gàr niam ờdo ờdă, geh cồng nha nàng sền gàr pràn kơldang să jan ai ală sau in mờ dong ală sau lòt bơsram wơl ờdo ờdă.

Cau mblàng K’Duẩn