VOV4.K’ho - Ƀộ Ngoại giao pà git, Thủ tướng ồng Phạm Minh Chính kờp dŭ geh tus pơrjum dờng kwơ màng mpồl ASEAN mờ lơgar Mỹ tàm tơngai tus. Di tàm dơ̆ do, Thủ tướng kung geh ală broă lơh bal đah bàr lơgar tàm lơgar Mỹ.

                                            Thủ tướng Cíñ phủ ồng Phạm Minh Chính

Cau sơ pơ̆ bơr Ƀộ Ngoại giao mò Lê Thị Thu Hằng pà git: “Kwang atbồ lơgar Mỹ neh geh sră jà Thủ tướng mờ kwang đơng lam ală lơgar tàm mpồl ASEAN tus bal pơrjum dờng kwơ màng mpồl ASEAN mờ lơgar Mỹ geh bơyai lơh tàm càr lơgar Washington D.C tàm tơngai tus. Ală lơgar tàm mpồl ASEAN ring bal mờ jơnau hòi jà bơh lơgar Mỹ bơyai lơh pơrjum mờ ală gah gam cri bơyai ală broă gơrềng bal tus mờ pơrjum, tàm hơ̆ geh tơngu me bè tơngai bơyai lơh. Thủ tướng Cíñ phủ lơgar Việt Nam kờp dŭ geh tus bal pơrjum mờ geh ală broă lơh bal đah bàr lơgar tàm lơgar Mỹ”.

Cau mblàng Ndong Brawl