Jăt Ƀộ Ngoại giao yal, 16 nă Đại sứ, Kwang ătbồ Anih lơh broă ala măt lơgar Việt Nam tàm lơgar ndai pa geh pồ dơ̆ do dờp lơh kơnòl, dờp lơh tai kơnòl broă tàm 48 dà lơgar, kơnhoàl ù tiah tàm jơh ală kơnhoàl ù tiah gùt plai ù. Tàm dơ̆ lơh broă, Thủ tướng Cíñ phủ ồng Phạm Minh Chính đơs sùm, ală nam do, gah Ngoại giao sùm dờng pràn, tă pơgồp kwơmàng tàm ală broă lơh bơ̆t bơtàu dà lơgar, tàm hơ̆ geh tă pơgồp bơh ală Anih lơh broă ala măt lơgar Việt Nam tàm lơgar ndai dê. Thủ tướng đơs là, kơnòl broă bơh ală Anih lơh broă ala măt lơgar Việt Nam tàm lơgar ndai dê là ngai sơlơ kơn jơ̆ kơn jŭt. Den tàng bè hơ̆, ală Đại sứ, Kwang ătbồ Anih lơh broă ala măt lơgar Việt Nam tàm lơgar ndai pal kơ̆ nùs, kơ̆ dơn mờ ngac ngar lơh jăt jơnau sồr, gùng dà broă lơh lơh broă mờ lơgar ndai bơh Đảng, Dà lơgar dê, tơl Kwang ătbồ Anih lơh broă ala măt kờñ pal gĭt nền cribơyai broă mờ lơgar ndai lơh sa drơng bơtàu tơnguh in, pơgồp bơnah tàm bơ̆t bơtàu rài lơh sa krơi is, rơcăng lài is, mờ rơcăng lài, jơh nùs mŭt gơrờm bal lơh sa dunia jrô ơnàng làm uă, tơl làm mờ geh cồng nha là dùl ai lài uă tàm tơngai lơh broă bơh he dê.