VOV4.K’ho- Mho ngai 25/7, Thủ tướng Cíñ phủ ồng Phạm Minh Chính còp, lơh broă mờ ală mpồl sền git ADN ƀồc ntìng cau ling chơt màng gam ờ hềt tơl jơnau yal tơnggit geh Viện pháp y ling klàng, Ƀộ Quôk phòng; Viện pháp y dà lơgar, Ƀộ Y tế mờ Viện Kông nghệ siñ họk, Viện Hàn lâm Khoa họk mờ Kông nghệ Việt Nam.

Thủ tướng ồng Phạm Minh Chính cùp rùp mờ ală mè gam geh ròng siam tàm Anih tờm ròng siam cau geh màng mờ dà lơgar

Tàm dơ̆ lơh broă, Thủ tướng Cíñ phủ ồng Phạm Minh Chính tam pà jơnau lơh ồng ngoh rơngac, gơ tơngòr bè bơta chờ hờp bơh dùl nă mè Việt Nam khin cha jak chài dê tàm Nghệ An tŭ jòi bàn ƀồc ntìng bơh dùl nă cau kòn dê tơnơ̆ 51 nam chơt phi să; kung bè bơta kơp gơn sùm bơh mè dê lài mờ tŭ sang rài tŭ dùl nă kòn tai bơh mè dê kung ờ hềt jòi bàn ƀồc ntìng. Tam lơh neh jơh bơh jŏ mơya bơta jê sồt kung gam sùm, ngan là gơ wèt tus mờ ală hìu bơnhă cau pròc mhàm tờm cau ling chơt màng; git nđờ rhiang rbô nă cau ling chơt màng ờ hềt geh đal git jơnau tơnggit là git nđờ tơlak bơta jê sồt, bơta kơlôi rơcang bơh ală cau gam kis dê. Thủ tướng đơs nền, Đảng, Dà lơgar mờ Làng bol he sùm sền gròi tus broă lơh cau ling sồt să, cau ling chơt màng nàng tơrmù ƀà bơta jê sồt bè nùs nhơm hơ̆ mờ ală broă lơh ngan ngồn, tàm hơ̆ geh broă tơnguh mhar tơngai lam lơh mờ cồng nha broă lơh lòt jòi, tờ tơrgùm mờ đal git mat ƀồc ntìng cau ling chơt màng gam ờ hềt tơl jơnau tơnggit. Tàm dơ̆ lơh broă, Thủ tướng Phạm Minh Chính neh sền dơ̆ yal cồng nha sền git ADN ală cau ling chơt màng; bal mờ kwang ala mat ală Ƀộ, gah broă lơh jàu cồng nha sền git ADN ai 12 hìu bơnhă cau ling chơt màng in; jàu sră tềm pềr priă 10 tơlak đông dùl sră mờ pà phan ală hìu bơnhă cau ling chơt màng in.

Cau mblàng K’Duẩn