Ala mat Cíñ phủ, Thủ tướng Phạm Minh Chính jờng rơ bơta pơn đơl pràn mờ cồng nha lơh geh bơh Đảng ƀộ, gơnoar atbồ, ling klàng mờ làng bol càr Điện Biên dê neh lơh geh tàm tơngai lài, pơgồp bơnah tàm cồng nha bal bơh dà lơgar dê.

Tàm tơngai tus, Thủ tướng sồr càr bơsram, kơlôi sơnơng, lơh jat geh cồng nha Nghị quyết pơrjum dờng dơ̆ 13 bơh Đảng dê, Nghị quyết bơh Ƀộ Cíñ trị dê mờ Nghị quyết pơrjum dờng Đảng ƀộ càr dơ̆ XIV. Bơtàu tơnguh lơh sa mpồl bơtiàn mhar mờ kơ̆ kơljap jat bơta ngui niam pràn kơldang ală bơta pràn, bơta ƀuơn, nùs nhơm brồ guh is. Tơrgùm bơt bơtàu, ngui niam geh cồng nha tiah gơn kơnòm lơh sa bơh càr dê; tam gơl dipal broă rơndap lơh ală gah lơh sa, ai lài bơtàu tơnguh lơh sa suơn sre, brê bơnơm, lòt nhơl, hìu măi pờ tơlik ồs đèng, phan kuơ tàm ù, lơh sa mờ măi mok lơh gơlik phan mờ lơh sa mpồng nhàr lơgar. Sền gàr mờ ngui niam ală bơta kuơ niam chài bơh yau, krơi is bơh ală jơi bơtiàn kòn cau mờ kòn bơnus Điện Biên dê. Sền gàr kơ̆ lơngap lơngai, sền gàr dà lơgar.