VOV4.K’ho- Mho ngai 8/05, Thủ tướng Cíñ phủ ồng Phạm Minh Chính neh lơh broă mờ Ƀan thường vụ Tỉñ ủy Thái Bình. Tàm dơ̆ lơh broă, Thủ tướng cih dờp mờ jờng rơ uă broă lam lơh jat  nghị quyết pơrjum dờng dơ̆ 13 bơh Đảng, Đảng bộ, ling klàng mờ làng bol Thái Bình dê; càr lơh jat ngan ngồn mhar Nghị quyết Pơrjum dờng Đảng bộ càr dơ̆ 20, lam lơh jat ală Nghị quyết bơh Dà lơgar, Quốk hội, Cíñ phủ dê.

Thủ tướng Cíñ phủ ồng Phạm Minh Chính lơh broă mờ Ƀan Thường vụ Tỉñ uỷ Thái Bình

Tơngai tus, Thủ tướng Cíñ phủ ồng Phạm Minh Chính kơ̆p kờñ càr Thái Bình geh bơta bơtàu tơnguh mhar, tơl làm, kơ̆ kơljap rlau tai; priă lơh geh kờp bal tơl nă cau pal uă rlau tai. Kờñ lơh bè hơ̆, den càr pal gĭt là ơm tàm tiah tờm tiah ring dà dờng Hồng, geh uă bơta ƀuơn, geh bơta pràn kòn bơnus dê, bơhiàn kah yau niam chài rơgơi... pal mut ngui uă ngan rlau jơh. Pal lam lơh jat Nghị quyết Pơrjum dờng dơ̆ 13 bơh Đảng dê di pal mờ ală bơta càr dê, lam lơh jat niam ală Nghị quyết bơh Quốk hội, Cíñ phủ dê nàng bơtàu tơnguh càr tàm ală bơta pa.

Cau mblàng K’Hạnh