Mho ngai 14/05, Ủy viên Ƀộ Cíñ trị, Thủ tướng Cíñ phủ ồng Phạm Minh Chính lơh broă mờ kwang đơng lam bồ ƀòn dờng Cần Thơ nàng sền sơ wì bơta lơh sa, kă bro, bơcri priă bơt bơtàu, tăc mờ blơi phan bơh lơgar ndai; ală bơta kal ke, kòl yan mờ ai tơlik bal gùng dà broă lơh nàng tă bơsong, sơlơ bơtàu tơnguh tàm ù tiah ƀòn dờng dê.

Đơs pơndŭt dơ̆ lơh broă, Thủ tướng Cíñ phủ ồng Phạm Minh Chính cih dờp, jờng rơ bơta pơnđơl pràn lơh ngan mờ cồng nha lơh geh bơh Đảng ƀộ, gơnoar atbồ, ling klàng mờ làng bol ƀòn dờng Cần Thơ dê, tă pơgồp uă ngan, geh cồng nha bal mờ dà lơgar kơ̆ kơljap lơh sa dờng, gròi sền roh giă priă, gàr geh ală tàm pơnring dờng, sơlơ tơnguh gơguh lơh sa, bơtàu tơnguh rài kis phan bơna mờ nùs nhơm bơh làng bol dê. Bè kơnòl broă tàm tơngai tus, Thủ tướng Cíñ phủ sồr ƀòn dờng Cần Thơ pơn jat tai jat sền, gĭt loh ală bơta; bañ rơngòt, kơ̆ kơljap, rcang lài, di tŭ, ngăc ngar, geh cồng nha nàng bơsong ală kơnòl broă sùm, ală broă gơlik geh nisơna, ală broă gam wơl; tơrgùm tă bơsong bơta kal ke, kòl yan ai làng bol, mpồl lơh sa kă bro in nàng sơlơ tơnguh lơh sa, lơh geh rài kis lơh broă sa ai làng bol in.