VOV4.K’ho- Tơnơ̆ dơ̆ lòt sền, Thủ tướng Phạm Minh Chính mờ mpồl kwang bàng lơh broă mờ kwang đơng lam bồ ƀòn dờng Hồ Chí Minh bè broă lơh sa- mpồl bơtiàn nhai 7, 7 nhai bồ nam mờ 2, 3 rơndap broă lơh bơcri priă dà lơgar kuơmàng bơh ƀòn dờng dê. Yal tàm dơ̆ lơh broă, ồng Phan Văn Mãi, Củ tịc Ủy ƀan Ñân zân ƀòn dờng Hồ Chí Minh pà git, khà gơguh GRDP 6 nhai bồ nam bơh ƀòn dờng Hồ Chí Minh dê gơguh 3,82%, tàm hơ̆ gơguh quý 2 uă rlau 3 dơ̆ pơndrờm mờ quý 1.

Bè kơnòl broă ală nhai lồi nam, ƀòn dờng geh tơrgùm tàm ală broă lơh ngan lam lơh gơtùi 19 broă jàu bè lơh sa- mpồl bơtiàn bơh bồ nam mờ Hội đồng Ñân zân neh ring bal. Mờ kơ̆ dơn là geh pơn đơl pràn lơh ngan lơh geh khà gơguh bè jơnau kờñ là bơh 6 tus 6,5%. Đơs tàm dơ̆ lơh broă, bal mờ broă jờng rơ ală cồng nha geh pơn rơ, Thủ tướng kung tơngkah ƀòn dờng Hồ Chí Minh pal pơn jat tai kờp sền, tă bơsong kal ke, kòl yan ai broă lơh sa, kă bro tàm ƀòn dờng in; kờp sền jơh ală bơta, bơtơl broă lơh tơnguh cồng nha, bơta niam bơt bơtàu gơnoar atbồ tiah drà, tam gơl niam broă bơcri priă, kă bro; lơh ngan lơh geh mờ sơrlèt rlau 19 broă geh jàu bè lơh sa- mpồl bơtiàn nam 2022. Thủ tướng kung jàu kơnòl broă ngan ngồn ai ală ƀộ, gah broă lơh in nàng pơgồp bal, bơsong jat gơnăp gơnoar ală jơnau sồr, jơnau dan bơh ƀòn dờng Hồ Chí Minh dê.

Cau mblàng K’Duẩn