Đơs pơndŭt dơ̆ lơh broă, Thủ tướng Cíñ phủ ồng Phạm Minh Chính đơs niam mờ jờng rơ uă ngan ƀòn dờng Hồ Chí Minh tàm bơta geh ală bơta kal ke, bơta lòng mơya neh lơh geh uă cồng nha pơn rơ ngan tàm broă bơtàu tơnguh lơh sa - mpồl bơtiàn, kờp dŭ geh 15/19 broă jàu bơh chờm lơh geh mờ sơr lèt broă rơndap lơh.

Bè kơnòl broă tàm tơngai tus, Thủ tướng sồr, ƀòn dờng Hồ Chí Minh pal lam kờp sền wơl jơh broă nàng mŭt tàm nam 2023 mờ nùs nhơm pa. Tềng đap mat, ƀòn dờng pal tơrgùm tàm broă rơndap ù tiah; sơlơ tơnguh pràn broă bơcri priă dà lơgar mờ 3 broă lơh jơnau kờñ dà lơgar. Tàm hơ̆, ƀòn dờng pơgồp bal mờ ală ƀộ, ngàñ bơsong jơh ală bơta kal ke kòl yan, sơlơ tơnguh 5 rơndap broă lơh tờm, tàm hơ̆ geh: ală rơndap broă lơh gùng rơndeh ồs tiah drà; Gùng pleh 3 ƀòn dờng; Hìu ơm rơlô T3 Ƀlàng rơndeh par Dunia Tân Sơn Nhất; gùng rơndeh ntoăt răt ƀòn dờng Hồ Chí Minh- Mộc Bài mờ Tây Ninh. Bơdìh mờ hơ̆, ƀòn dờng Hồ Chí Minh pal pơn jat tai lơh ală broă lơh rcang sơndră kòp Kovid-19, ngan là cĭt vaccine rcang sơndră kòp nàng gròi sền kòp.