Jat jơnau yal, 6 nhai bồ nam 2023, bơta cồng nha bơtàu tơnguh lơh sa mpồl bơtiàn càr dê neh lơh geh 2, 3 cồng nha kuơmàng, kờp jơh phan lơh gơs tàm càr gơguh 3,43%. Rơdap tap sèng lơh sa tam gơl niam. Đơs pơn dut dơ̆ lơh broă, Thủ tướng Phạm Minh Chính jờng rơ bơta pơn đơl pràn mờ đơs niam cồng nha mờ Đảng ƀộ, gơnoar atbồ mờ làng bol càr Long An neh lơh geh tàm broă lam lơh kơnòl bơtaù tơnguh lơh sa mpồl bơtiàn tàm tơngai lài.

Bè gùng dà ai tơlik lài bơtàu tơnguh bơh càr Long An dê, Thủ tướng đơs loh, Long An pal lam lơh geh cồng nha broă rơndap lơh tờm nàng lơh gơlik bơta bơtàu tơnguh pràn, kơ̆ kơljap jŏ jòng sùm, tơnguh gơnoar broă bơh Long An dê jat tàm ală gah broă tờm là Lơh sa suơn sre brê bơnơm là tờm; Lơh sa tơlir, kông nghệ kao, lơh gơlik, mòn phan, năng lượng là bơta tam gơl pràn; broă drơng ala là bơnàng jă, ai Long An gơ gơs là anih ơm wơl ntrờn mờ jun pơndiang phan tàm tiah do. Mờ kung ngui geh cồng nha ală bơta pràn, bơta ƀuơn; tàm tơrbŏ geh cồng nha mờ tiah tờm lơh sa ƀòn dờng Hồ Chí Minh mờ tiah đah jum mat tơngai lik dà lơgar; ngui niam bơta ƀuơn là tiah tàm tơrbŏ bal mờ Campuchia.