VOV4.K’ho- Tơnơ̆ lòt sền ngan ngồn tàm bàr pe ƀòn lơgar, gah broă lơh mờ rơndăp broă lơh tờm kwơmàng, drim ngai 13/03, Thủ tướng Cíñ phủ ồng Phạm Minh Chính mờ mpồl lơh broă bơh Cíñ phủ dê neh lơh broă mờ kwang đơng lam bồ tờm ngan càr Khánh Hoà dê. Kwang đơng lam bồ ală ƀộ, gah lơh broă kâp dà lơgar đơs là, càr Khánh Hoà là tiah geh anih kwơmàng mờ geh bơta pràn, bơta ƀươn uă bơtàu tơnguh lơh sa- mpồl bơtiàn tàm tiah đah jum tàm gùl lơgar mờ Tây Nguyên, mơya ờ hềt ngui jơh geh bơta pràn, bơta ƀươn nàng bơtàu tơnguh.

Đơs pơndŭt dơ̆ lơh broă, Thủ tướng Cíñ phủ ồng Phạm Minh Chính đơs sùm, Khánh Hoà geh anih lơh broă dờng màng ngan tàm bơtàu tơnguh lơh sa- mpồl bơtiàn mờ sền gàr dà lơgar mờ bơta lơngăp lơngai bơh dà lơgar dê, Khánh Hoà pal kơlôi sơnơng mờ lam lơh jăt geh cồng nha Kơrnoăt Pơrjum dờng dơ̆ XIII bơh Đảng dê mờ Kơrnoăt Pơrjum dờng Đảng ƀộ càr; đòm jăt mờ lơh jăt di gùng dà bơh Đảng dê, gùng dà broă lơh kơrnoăt boh lam bơh Dà lơgar dê, bơta sồr lơh mờ đơng lam bơh Cíñ phủ dê. Khánh Hoà pal đòm jăt pràn kơldang nùs nhơm tam klăc, pơđơl pràn is, lơh tờm is; Sơlơ tàm jàu kâp, tàm jàu gơnoar, să tờm is kơnòl broă gơ lòt jăt bal mờ lòt sền, jăt sền, gròi sền gơnăp gơnoar; geh broă lơh sền swì, jăt sền geh cồng nha broă lam lơh jăt bơh tơl kâp dê.

Cau mblàng Lơ Mu K’Yến