VOV4.K’ho - Tàm mho òr (06/03), Thủ tướng Cíñ phủ ồng Phạm Minh Chính bal mờ ala măt kwang đơng lam ờ uă Ƀộ, gah lơh broă dà lơgar lơh broă mờ kwang đơng lam càr Kiên Giang nàng sền wơl cồng nha tơnguh bơtàu lơh sa mpồl bơtiàn nam 2021, 2 nhai nam 2022 mờ gùng dà broă lơh tàm tơngai tus.

Tàm dơ̆ lơh broă, Ƀí thư Tỉñ ủy Kiên Giang ồng Đỗ Thanh Bình pà git, nam 2021, càr Kiên Giang kung bè uă càr gơtìp gơrềng uă ngan bơh kòp Kovid-19, mơya jơh 3 tiah lơh sa kung gam geh khà gơguh (bŭ lah ờ uă) tàm bơta gam gơtìp uă kal ke. Lơh sa gơguh dương, GRDP gơguh 0,58%. Tă tàm kes priă dà lơgar geh rơlao 11 rơbô tơmàn đong. Đơs pơn dŭt dơ̆ lơh broă, Thủ tướng Cíñ phủ ồng Phạm Minh Chính pơn jờng mờ đơs niam ală cồng nha mờ càr Kiên Giang neh lơh geh tàm tơngai pa do, tàm hơ̆ uă ngan tàm broă tam dră mờ kòp gơtờp, bơdìh hơ̆ tai, Thủ tướng kung sơñio loh ală broă gam gơkòl, ờ hềt niam, ờ hềt pràn mờ ai geh gùng dà tơnguh bơtàu. Thủ tướng sồr, càr pal ngui cồng nha ală bơta geh, bơta pràn, bơta niam tơnguh bơtàu, lơh broă pràn, tam gơl bơta tơlòng gơs bơta niam, kal ke gơs bơta pràn. Tơnguh bơtàu pràn lơh sa dà lềng, chồl pràn broă bơ̆t bơtàu lơh sa suơn sre, tơrgùm tơnguh bơtàu ală gah lơh sa mờ măi mŏk geh bơta pràn, ai tơl bơta niam mờ tiah kis ƀuơn tơnguh bơtàu lơh sa mpồl bơtiàn.

Cau mblàng Ndong Brawl