Tàm dơ̆ lơh broă, yal mờ Thủ tướng Cíñ phủ ồng Phạm Minh Chính, Thiếu tướng ồng Phạm Hải Trung, Kwang atbồ Gah đơng lam sền gàr Gơlăng ƀồc Củ tịc Hồ Chí Minh, Kwang atbồ Mpồl atbồ Gơlăng ƀồc pà git, 6 nhai bồ nam 2024, Mpồl atbồ Gơlăng ƀồc neh lơh niam kơnòl broă tă pơgồp jơnau đơs mờ Đảng, Dà lơgar, Thủ tướng Cíñ phủ mờ Quân ủy dà lơgar, Ƀộ Ling klàng bè kơnòl broă sền gàr jŏ jòng, sền gàr lơngăp lơngai ƀồc Củ tịc Hồ Chí Minh.

Ala mat Cíñ phủ, Thủ tướng jờng rơ mờ đơs niam ală broă lơh ngan, bơta pơn đơl pràn, nùs nhơm geh kơnòl mờ cồng nha lơh geh bơh mpồl kwang bàng, công chức, viên chức, cau ling mờ cau lơh broă Mpồl atbồ Gơlăng ƀồc dê mờ ală anih lơh broă, mpồl lơh broă, cau dồ nă să lơh kơnòl broă tàm Mpồl tiah tềl kah yau – niam chài Ba Đình. Tơngai tus, Thủ tướng sồr Mpồl atbồ Gơlăng ƀồc pơn jat tai tơnguh nùs nhơm rơcang lài, bơceh lơh, pơgồp bal jơh nùs, geh cồng nha mờ ală anih lơh broă nàng lơh gơs jak ngan kơnòl broă geh jàu mờ jơh plai nùs, bơta kờñ gơboh dà lơgar, nùs nhơm pơn yờ să jơi bơtiàn.